Thithia Part 5: Ūrīa Thithia Akinyire Kwa Múthamaki

Rúgano Rwa Mwanake Njamba Nene Wetagwo Thithia

Thithia Kwa Múthamaki

Athianga Thithia nīakinyire handú haarī na mútitú múnene, na hau nīho haarī na múciī wa múndú múgo. Agīciria atī nī wega athiī gwake akaragúre na akaheo kīrīra úrīa egútwara indo icio aarī nacio kwa múthamaki. Akinya kwa múndú-múgo makīragúra na magīthīnja ndúrúme yaarī ya mwīrī úmwe, agītahīkio thahu wothe wa andú arīa oragīte nī getha thakame yao ndīkanamúrehere mútino thutha-inī. Agīcoka akīrathimwo na akiugīrwo úhoro agīthiī.

Rīrīa ahītúkaga andú aingī mamuona makīúngana mamwīrorere amu ngumo yake yarīkītie kúhunja guothe makoigaga, “Onei njamba īrīa īrīkītie kúúraga miitú na njangiri ciothe.” Nowe ndathikagīrīria úrīa moigaga tondú ngoro yake nī yahīahīaga na ageciria úrīa egwīka onana na múthamaki na kana hihi nīegúkúngúīrwo nīwe.

Akinya kwa múthamaki akīrúgama múromo-inī. Nakuo kúu thīinī nī kwonganīte ihīī cia múthamaki ikīrīa na ikīnyua igīkenaga. Ihīī icio ciamuona ikīmwanīrīra, “We nī we ú, na úrenda kī gúkú?” Akīmera, njúkīte gúkú nīguo heo irio na nyonane na múthamaki.” Magīcokanīrīra makīrana, “Nī mwaigua úrīa kararia gekinyīire, nītúkaingate.” No hakīaga úmwe wao múmīrīru wa gúthiī kúmúingata, amu nī mecúranagia tondú arī na hinya kúmakīra, makoiga, “Kaī niī ti niī ngúthiī-ī, e na icoka nene kúngīra, ndigúthiī ndakanjúrage.”

Thithia ona matikúmúrúmbúiya agīīta ngombo yaarī hau hakuhī akīmīra, “Thiī kwī muthamaki úmwīre atīrī, Thithia mwanake úrīa úúragīte njangiri na mīitú yothe ya búrúri wake e haha okīte nīguo atugwo nīwe.” Ngombo īyo īgīthiī īkīīra múthamaki úrīa yerwo, no we ndakenire tondú ngoro yake nī yambīrīirie gwīciria na gwīcúrania úrīa mwanake ta úcio angīkorwo akīenda harī we. No agīcoka akiuga nīwega athiī akamuone. Na akinya harīa arúngiī akīrúgama, nake Thithia agīcīria, “Ndingīmúhīmbīria ta arī baba tondú ndangīndirikana nī tondú nī aingatire maitú tene múno o ndaciarwo.”

Thithia agīturia ndu hau magúrú-inī ma múthamaki akīmwīra, Ndīkītie gúthondeka búrúri waku wothe, ngoraga mīitú yothe na njangiri ciothe na nyamú iria njúru, na rīu ndoka gúkwīra úhe múcara wakwa.” Nake múthamaki akīmucokeria, “O na ingīkúhe kī kana kī ndikuona harī kīndú o na kīmwe kīngīhota kúrīha wega úrīa wothe wīkīte, tiga ngúheire irio úrīe na wambe úhurúke.” Múthamaki agīathana Thithia athondekerwo handú ahurúke arīe na anyue. Ambīrīria kúrīa akīona mútumia wa múthamaki agīúka harī we akuite kīndú kīahanaga ta maī matheru múno gīkīrītwo indo-inī cia goro ciakengaga. Akīrúgama mbere yake akīmwīra, “Ke maī maya únyue amu wanyua nī megúkúnogora mīnoga īrīa yothe útuire nayo, ningī nī megúkúhonia ironda na kúrīa gúothe wanatihio úkīrúa.”

Rīrīa aragia úguo akīmekīra gīkombe kīahenagia múno na múruki wamo úkiiyúra nyúmba yothe. Thithia atanamúkīra gīkombe akīigua e na ngunyīrīrī moko na orīmwe akīmenya atī úcio warī úrogi endaga kúrogwo naguo nī mútumia úcio. Akīmwīra, “Ndúkīambe úkunde hanini amu túngīkundanīra nīgúo mekugīa na cama makīria.”

Nowe akīrega akīmúhenia atī aarī múrúaru. Na kahinda o kau Thithia akīaria na múgambo múnene akīmwīra, “warega gúkunda nī ngúkúúraga.” Akīoya thimbú yake īrīa oragaga njangiri nayo akīrúgama na igúrú amúringe. Nao andú arīa maarī kúu thīinī makīrúrúngana mamakīte. Nake mútumia úcio akīrekia maī macio thī akīúra, ateng’erete agīthiī búrúri múraya na ndaacokire kúonwo rīngī.

Rīrīa múthamaki onire úrīa gwekīka agīthiī harī Thithia arakarīte múno akīmútetia. Na kahinda o kau Thithia agīcomora rúhiu rúrīa rwa njora arútīte ihiga-inī o na iratú, agīcioya na igúrú akīmwīra, “Ihiga nī rīagaragaririo na indo iria cīari ho nī ici, no mwene cio núú?” Nake múthamaki agīcokacoka na thutha hanini akīanīrīra akīīra andú atīrī, “Andú aya ngúmwīra atīrī, úyú nī múriú wakwa, mwana mwega na njamba nene gúkīra ithe úrīa wamúciarire.”

Rīrīa ihīī cia múthamaki ciaiguire úguo ikīrakara múno tondú wa kúona úrīa endirwo nī ithe, na atigwo hau arúngiī e wiki othe magīúkīra makīoya matimú mao makīmúguthúkīra mamúrage. Nowe akīmera, aihwa akwa, tigai kwenda úúru, wīcokereii múikare harīa muma amu mwarega, múrothúrwo nī irī na thakame yanyu īromúcokerera.” No matiaiguire tondú wa úrīa maarītwo nī njohi, makīambīrīria kúmúikīria matimú na mbaara īkīgwatanwo. Makīhúrana múno mamúhītīte no tondú wa úrīa aarī na mītúkī akīmahúra othe akīúraga amwe ao na arīa angī akīmaingata, makiuma makīyúrīra.

Related Stories about Thithia

Other Resources

Follow Kikuyuland on Twitter

Check out Other Stories

Source: “Wīrute Gīkūyū, Ibuku rīa Gatatū” by Fred K. Kago

Add a Comment

Your email address will not be published. Required fields are marked *