Thithia Part 6: Ūrīa Thithia Oragire Nyamú Yaikaraga Mungu Thīini

Rúgano Rwa Mwanake Njamba Nene Wetagwo Thithia

Thithia na Nyamú īrīa yaikaraga mungu thīini

Thithia aikaranga ta kahinda ka mīeri ītatú akīambīrīria kuona andú othe me na kīeha o na makīria ithe. Na rīrīa amoririe gītúmi kīa maiyúrwo nī kīeha úguo akīrwo atī ihinda nī rīakinyīte rīrīa mokaga gútahwo, magakuo airītu na anake nī múthamaki wa itúra rīngī, magathiī gúikīrio nyamú yarīyanaga nīguo marīhe thiirī wa múrú wa múthamaki úcio woragītwo nīo hingo īmwe tene.

Rīrīa Thithia aiguire úguo akiuga, “Niī nī ngúthiī na kwenda gwakwa ngaikīrio nyamú īyo, na ndaikio ngageria kúmīúraga nīguo matikanacoke gúúka gútaha andú a rúrīrī rwitú rīngī.” No ithe akīmúthaitha múno akīmwīra atige gúthiī tondú nī ekuona úrīa akúrīte na ndarī na mwana úngī wa kúgaya úthamaki wake tiga we wiki. No rīrīa onire múrúwe nī arega biu akīmwīra, “No gīthiī na rīrīa úgacoka úrīkītie kúúraga nyamú īyo úkahaicia bendera njerú meri-inī yaku nīguo menye atī nī úhotanīte ndakuona úgīúka tondú ngútúúra njúthagīrīria iria-inī.

Hīndī ya gútahwo yakinya múthamaki úcio akīgīra anake múgwanja na airītu múgwanja. Makinya kúu magītwarwo kwa múthamaki akambe kúmona. Thithia akīrúgama mbere yake akīmwīra, “Ndagúthaitha úreke nyambīrīrwo gúikio kúu kúrī nyamú īyo īrīanaga.”

No múthamaki akīmwīra atige kúhiúhúka na ndagecirie nī egútonya nyúmba īyo ena indo ciake cia mbaara. No Thithia akīmúhatīrīria múno kinya agīītīkīra. Nacio thigari īgīathwo ikambe kúmúikia mbere.

Hwa-inī gwakinya atanaikio múirītu wa múthamaki, tondú wa úrīa amwendire amuona, agīúka ahithīte rúhiú akīmúheherera akīmwīra, “Ke rúhiú rúrú úgeteithie naruo na wahotana ndagúthaitha ndúkanandige gúkú amu baba angīkamenya úrīa ndeka no akanjúraga.” Ihinda rīakinya agītwarwo múromo-inī wa kīnyúmba kúrīa  nyamú īyo yaikaraga agītonya, naguo múromo úkīhingwo. Akīrúgama hau ehúgīte agaīkagia maitho na mīena yothe amu ndamenyaga na kúrīa nyamú īyo īkuuma nakuo. Rīrīa acangacangaga etereire akīona kīnyamú kīoimīra. Kīnyamú kīu kīarī na mútwe wahianaga ta wa ng’ombe na magego mahianaga ta ma múrúthi ningī dwara ta cia nderi, na mwīrī úyú úngī ta wa múndú.

Gīkīmúguthúkīra kīmúnyite kīmúrīe, no tondú wa úrīa aarī na mītúkī akīīheta na kamwena na yakuhīrīria akīmītema kúgúrú na rúhiú. Rīrīa nyamú īyo yaiguire ruo īkīguthúrana nake magīteng’erania kúu mungu-inī, moima úyú magatonya úyú úngī, kinya akīrakara akīrúgama amīeterere nayo mbaara īkīgwatanwo.

Nyamú yageria kúmúrúma igatemwo kanua, ningī yageria kúmúkunya īgatemwo gúoko, okinya īkīhatīrīrio handú īgītinio ngingo īgīkua.

Yakua Thithia akiuma kīnyúmba kīú na ihenya arúhītie múno akīhingúra múrango, no hau múromo-inī agīkora múirītu úrīa wa múthamaki amwetereire akīmwīra, “úhoro nī wathira nī ndamīúraga.” Magīcoka magīthiī makīhingúrīra arīa angī tondú thigari nī cia komete toro múnene múno magīikúrúka meri-inī yao magīthiīra. No múirītu wa múthamaki ndakinyire kwaa Thithia múciī atigirwo handú akomete makīriganīrwo nīwe. Ningī úhoro wa kúmakania nī atī Thithia nī ariganīirwo nī kuoherera bendera mwerú nīguo ithe one. Na rīrīa ithe onire meri īyo īgīúka ītarī na mútama mwerú akīikia iria-inī agīkua tondú eciririe múrúwe nī arīkītie kúúragwo.

Thithia akinya kwao agītuika múthamaki handú ha ithe na agīathana mīaka mīingī. No thutha-inī akīambīrīria gwītīya múno akonaga arīa angī ta matarī bata. Akīambīrīria kúrúwaga na andú na gúthiaga mabúrúri mangī kúúragana. Na thutha-inī agītigwo kúndú gīthaka-inī, agīkua gīkuú kīúru múno na andú ake matiahotire kúmúthika na gītīyo. Mahīndī make macokire kuoneka kúndú kúu akuīrīire na andú makīmúmenya, tondú maarī manene gúkīra na andú arīa angī.

Noguo ciana ciakwa noguo gúgútúúra gútuīkaga kinya múthia. Atī o na mahinda macio ma tene o na maitú, iheo ciothe, hinya o na múnyaka ciumaga kúrī Ngai. No andú mangīkúra mwītīyo na kwīenda múno na mahúthīre iheo cia Ngai úúru, arīmarekagīrīria magathiī na njīra ciao kinya makahoteka. Ngai nī atúteithie ithuothe na atúhe úúgī na úcamba twīkage maúndú manene ma magegania. Ngai arotwehereria mwītīyo twarīkia gwīka maúndú macio na túgatiga kwīgana nīguo tútikagwe túcokage gúconoka.

Related Stories about Thithia

Other Resources

Follow Kikuyuland on Twitter

Check out Other Stories

Source: “Wīrute Gīkūyū, Ibuku rīa Gatatū” by Fred K. Kago

 

Add a Comment

Your email address will not be published. Required fields are marked *